كتب الشاعر/ طارق السيد ¥شبه الناس ¥

(شبه الناس)
قربوا مني ياخلق شوية
بس بشرط ماتلزقوا فيا
عشان اللزقة في علم الطب
بتجيب لنا هرش وحساسية
 طبعا عارفين إني بهزر
علشان طبعي راجل مهزار
لكن وقت الجد أشتد
وأقول للديب إعقل ياحمار
نرجع مرجوعنا لحكايتنا
ونتسرسب جوة التفاصيل
ونشوف صور الناس في حياتنا
ونقول نبذة وبالتفصيل
هحكيلكم عن ناس مشوية
وناس مقلية وناس محشية
وناس عايمين على وش الفتة
وناس غطسانة جوة الملوخية
وناس مهرية وناس مرمية
وناس محظوظة وناس فقرية
وناس محظورة وناس مأمورة
وناس تانين واقعين في الخية
وناس بتحلي وناس بتحدق
ناس بتهجص ناس بتصدق
ناس كيادة وناس صيادة
وناس بلبانة واقفة بتتشدق
ألف سلامة ياخلق عليكو
بكرة هعدي أنا من نواحيكو
ولو فاضين هحكيلكو حكاية
ناس تشبهكو ومش زييكو

بقلم طارق السيد