كتب الأسطورة أ/ طارق السيد $موال الناس $

موال الناس
إقعدوا عالأرض إفرشوا منديل
طرطأوا ودنكوا ولا ودن الفيل
هغزلكوا موال ع الناي
عن ناس دوغري وناس بتميل
ناس مش لاقية وناس مناشير
ناس فى الساقية وناس في البير
ناس في عرينها كلت مصارينها
وناس في أعشاشها وناس بتطير
وناس سميعة وناس بتقول
وناس لميعة وناس من دول
وناس فطرانة باتيه وساليزون
وناس غطسانة في قدرة فول
وناس هتيفة وناس سقيفة
وناس تتلف في علبة قطيفة
وناس حريفة ياعيني عليهم
متكتفة حتة تكتيفة
وناس نتيفة بتنتف ريش
وناس غلبانة بتاكل عيش
وناس حرامية ومستقوية
وناس بتنادي إلحق ياشاويش
وناس بتشب وناس بتطاطي
وناس تستعصى وناس مطاطي
وناس بلسانها بتدبح ناس
وناس مش سامعة لناس بتهاتي
قوموا ونفضوا بقى منديلكو
ولا تحبوا أجيلكو وأشيلكو
لو كان لسة في عمري بقية
هجيلكم بكرة ياناس وأحكيلكو
بقلم طارق السيد