.. دقيقة سكات.. كلمات الشاعر/ خالد عبد المعطي

 دقيقه سكات..

..

(جورج سيدهم)

هس استنى شويه يا ضيف

اما ده يبقى حتة صيف

حر ؟ و ماله بس جماله

اجمل من ألوان الطيف..

لو بصحيح التالت أت .

دقيقه سكات..

..

( الضيف احمد)

هات الاورج

و هات نوتة الالحان م الدرج

اعمل همه شويه يا جورج

كان بعده طويييل و بطول البرج

و زمن البعد اهو ولى و فات ..

دقيقه سكات ..

..

(جورج سيدهم)

فوزى اهو ساب الزفه و جاى

يا عبد المعطى ماتقولش ازاى

حواديتنا اهى رجعت بعد غياب

نطبخ يا ملايكا و نعمل شاى

راجعين يا حياه مهما قالوا مات..

دقيقه سكات ..

..

(الضيف احمد)

سكوت كلاكيت بارتيه

اهو جاى علينا و هل البيه..

سلامات مش هنسأل غيابك ليه

ماهو كله يا صاحبى و ليه أوقات..

دقيقه سكات..

..

(سمير غانم)

بالحضن يا عشره يا وحشانى

ده معادش فراق ليكم تانى

احلف بباروكتى و طقم سنانى

قلبى فى غيابكم فاتنى و ماات

و الدنيا سكات..

..

(الثلاثى)

و اهى خلصت و خلاص اتجمعنا

و خلصنا خلاص من اوجاعنا

يا حبال العمر ما فلسعنا

ورينا يا دنيا هتقسى ازاى

و تفرقى تانى ما بين الاخوات..

دقيقه سكات..

..

حواديت براغيت بس بنقرص

و القرصه اقوى من الدبابير

على الجرح كمان نقدر نرقص

و نخلى الاه فى ثوانى تطير

بنخبى دموع و نموت م الجوع

و تزاحم الدنيا بضربة كوع

حافيين ماشيين فوق المسامير..

..

ثلاته صحيح بس بمصابيح

الضحكه عشنا و نورنا

غنينا ساعات و بكينا ساعات

لكن الدمع ما يكسرنا

علينا الضحكه لغاية فوق

و رمينا الدمعه فى اخر البير

و فضل اتنين قاعدين على شوق

لحد ما شرفت يا عم سمير

و اللى ما يعرف بيقولك مات

دقيقه سكات..

..

#خالدعبدالمعطى