سجال ارتجال مباشر
في أحد المنتديات
بيني.. صفاء الخواجه
والأستاذ الشاعر .. عوني هشام
===================
......... صفاء الخواجة
باعترف لك
إني لسه محتاجة لك
رغم غدرك. رغم هجرك
رغم بُعدك فجأة عني
وإني مش عارفة أفسر
أو أأقدر. ليه بعدنا
بس لسه قلبي هايم
لسه بيغني كلامك
يوم ما كنت وموعودة لك
عيني يملاها بكايا
لما تصحى مشتاقة لك
نفسي أعرف إيه جنيته
خلى ف الهجر. النهاية
لما أفكر بألقى نفسي
لازم أنسى!
كل وعد وعدتهولي
كل عهد أخدتهولي
بس حبي بقلبي .صادق
شوقه قاسي
عايزة أنسى كل حاجة
بيها أفتكرك وأحزن
بس ويلي من حنيني
لما شوقي بيناديلك
أنت من عيني سقط
بس قلبي لسه برضه
حبه طاير
لسه شوقه يوم ما حط
نفسي أنسى كل ظلمك
أو تقولي ليه هجرت؟
========
.................عوني
عايز أنسى وأنسى ليه
هو قلبي عملك إيه
نازله بتحطي عليه
وكل حاجة من خيالك
رغم بُعدك رغم هجرك
هو برضه لسه فاكرك
وف هيامه برضه ذاكرك
بس إيه غير فى حالك
عاش بحب وكان ماليه
نفسه شوق يتغطى بيه
وانتى دايما تبعديه
هو فين راح كلامك
الوعود زادت وفاضت
والقساوة معاكي زادت
كل دا وانا برضه ساكت
صارحيني انتي مالك
واخده ركن فى البعيد
قولي حاجه فى المفيد
انا قلبي مش جديد
ياما خد مني وشالك
بس ذاكري فى اللي راح
لما زودتي الجراح
خلاص مفيش بينا مباح
لازم انسى ومكتوبالك
..... وعجبي
...... عوني هشام
-------------------------
....... صفاء الخواجة
كل حاجة... من خيالي
ناسي هجرك لي وآلامك
ويا غدرك. وإشتياقي
ناسي ليلي معاه عذابك
جاي بتدافع ...وتظلم
فين دموع قلبي بهوانك
روح ياظالم. وابعد أحسن
مش عشاني . لأ عشانك
--------------
.............عوني
مش هارد بأي قسوة
رح ازيد الحرف نشوى
عن غرامي بشوق ونجوى
واللي شيلته معاك عشانك
أي ذنب عملته فيك
افتكر جرحي بايديك
تبتعد أنده عليك
وأنت بتسد ف ودانك
ذنب واحد كنت عارفه
حبل ودك ساب بطرفه
وكل سطر مال بحرفه
لما طار عقلي بجنانك
وانا صابر
..... وعجبي
...... عوني هشام
_____________
......... صفاء الخواجة
ليه تبرر . ناسي عهدك
لما هجرك دام و خُنته
فين غرامك.ليه بتكدب
فاكرة ظلمك إللي عشته
روح لغيري ..بكره تعرف
فرق حبي اللي أنت بعته
--------------
........... عوني هشام
انا واثق من كلامي
مش رح اكشف عن آلامي
لما خنتي يوم غرامي
ودا كان بخلاف لوعدك
كنتي طير وهجرتي عشك
عمر ما فكرت اهشك
ولا يوم فكرت اغشك
وكل فكري كان فى سعدك
انا شفتك ويا غيري
ساعتها حددت مصيري
عشان نكرتي كل خيري
عايزاني ارجع لا دا بعدك
...... وعجبي
..... عوني هشام
-------------
......... صفاء الخواجة
مين لغدرك نفسه يرجع
أنت حالم .ناسي غشك
والخيانة..دي فى ..طبعك
لاصقة فيك.. كنيتها اسمك
اللي زيي.. توبها يعشق
الوفاء.. وكرهت عشك
...................
بقلم أ. عوني هشام
أ. صفاء الخواجة
ليست هناك تعليقات:
إرسال تعليق