"حب الناس"
---------------
لما تكون بتحب الناس
تلقىٰ الناس كلها بتحبك
لما بتسعي لعمل الخير
عمر الدنيا ف يوم ماتذِلَّك
أصل الحب ده حاجة جميلة
لو حبيت الحب يصاحبك
أما الحقد ده شئ مكروه
عمر الحاقد يوم مايحبك
إبعد عنه وعن أحقاده
أصله بحقده أكيد هيضُرَّك
لما يشوفك يوم فرحان
غِلُّه يسوقُه ويقتل فرحك
ولما ف يوم تحْصَلَّك أزمة
تلاقيه يفرح ويزيد همك
لما ياصاحبي تكون محبوب
روحك تصفىٰ ويفرح قلبك
ربى يبارك فيك ويعزك
والناس كلها تفضل جنبك
أصْلَك لمَّا تحب الناس
تلقىٰ الناس كلها بتحبك
--------------------------------
بقلم : م/ محمود الحريرى
من ديواني "ابتدا بحبك صباحي"
ليست هناك تعليقات:
إرسال تعليق