بنتي حبيبتي
------------------
بنتي حبيبتي ياغالية عليا
فرحة عمري وضي عنيا
إنتي النور اللي دخل بيتنا
ربنا بعتك لينا هدية
بوجودك زادت فرحتنا
ياللي مليتي علينا الدنيا
من صغرك والناس بتحبك
ماهو قلبك مليان حنية
ولما كبرتي لقيت قدامي
أجمل بنت وأحلى صبية
لما بشوفك قلبي بيفرح
والدنيا تنور حواليا
ربنا يطرح فيكي البركة
ويبعد عنك أي أذية
عاوز اقول لك كلمة ف ودنك
علشان عيشتك تبقى هنية
جوزك حطيه جوه عنيكي
خليكي جنبه وكوني قوية
واولادك دايما تراعيهم
ربيهم أحسن تربية
وامك دايماً تفتكريها
وابقي ادعيلها كل شوية
خليكي دايماً نبع محبة
وكوني لاخوكي أمه التانية
وانا بدعيلك ربي يصونك
وتكوني دايماً متهنية
-------------------------------
بقلمي؛ م/محمود الحريري
ليست هناك تعليقات:
إرسال تعليق