🌹هات الأولىَ
🌹
الست جميلة.. بسلامتها
عاملة لنا حوار
قال ايه المية ف شقتها
يلزمها الزار
دي ضعيفة لا تغسل غسلتها
وفاتورة من نار
وتزعق على فاتح ..مية
وعراكها شرار
ياما قولنا ماتورك للأزمة
حلو ومش ضار
وبلاش لعراكنا اللي يخسر
جارتك والجار
****
والست عزيزة كمان عاملة
موال حكايات
ويوماتي خناقة ورافعة لنا
أزماتها.رايات
الغاز بقى.. غالي وأنبوبته
ماتكفي ساعات
سخانها بيسحب ..كهربته
وفضيحته صاجات
وحياتها مشاعها على جيرانها
زي الأفيشات
ما تلمي لنفسك ياحبيبتي
والصبر تاجات
***
جوه شارعنا ..كتير أوجاع
حوجة وجهل صراخ وهياج
مش بالعافية.. نحل مشاكل
ولا بكآبة وفرض سياج
لازم نتعلم ..وعقولنا
ح نشغلها دي هي التاج
حكم مخك.. وأدرس حاجتك
خلي خشبنا بدال العاج
هات الأولىَ.. يليه الأولىَ
وبلاش شكوى وسوء لمزاج
أنا مش جاية.. عليكم أبدا
ح يحلها واحد ..فراج
***
🌹بقلمي/ صفاء الخواجة 🌹
ليست هناك تعليقات:
إرسال تعليق