الشاعر / رضا البوشي
المسحراتي ( اداب الصيام )
وحد الدايم اصحى يانايم
🌹 وقول بكرة ناوي الصيام
قلوب زي الورد بتنطط
وعيال بترسم الضحكة بالالوان
تراويح بتخلي الروح بتتبسم
ولسان ذاكر بيختم القرآن
وفلان راكع وفلان ساجد
زحمة في كل المساجد
بركة شموس رمضان
اصحى يا نايم وحد الدايم
الفجر صاحي والعمر ماشي
والطير مسافر والنمل رافع ايدة بيسبح
وكل واحد رزقة على الرزاق
🌹بوس ايدين امك وارضي كمان حماتك
وفرق على الغلبان فطورك وصحتك وزكاتك
وزي ما بتكنز فلوس لبكرة
اعمل كمان لمماتك
دنيا آخرها شبر في متر
والبقية في حياتك
اصحى يا نايم وحد الدايم
الفجر صاحي والعمر ماشي
والطير مسافر والنمل رافع ايدة بيسبح
وكل واحد رزقة على الرزاق
🌹قالوا في الأمثال (أصوم وافطر على بصلة)
ونا اللي بقولها بأعلى صوتي وع المكشوف
لو القلوب جواها حبة رضا
بصلة المحب على مراوحي
هتبقى زي الشهد جواها الف خروف
اصحى يا نايم وحد الدايم
الفجر صار والعمر ماشي
والطير مسافر والنمل رافع ايدة بيسبح
وكل واحد رزقة على الرزاق
ليست هناك تعليقات:
إرسال تعليق