🍁نمبر ون🍁بقلم الشاعرة/ صفاء الخواجة

 نمبر ون

🌹🌹🌹

أنا جاية احكي لكم ياحبايبي

عن حالي وعن كل احوالكم

معقول الندل.. نسقف له؟

وخسيس بالرخص وراح باعكم

وولاءه  لغيرنا  ومصلحته

بالتبن ده بايع لدهبكم

اصحوا لهم يلا بقى اتكاتفوا

واوقفوا مسرحهم بإيمانكم

ده العرض وباين من وقته

نخاس ح يبيع حتى احلامكم

حجتكم إيه وياخلق ياهو 

بلطجته وساقها مع كسلكم

سايبنهم ليه يمحوا تراثنا

ويزايدوا صباحا بآلامكم

بمخدر يقضي على شبابنا 

وبحسرة تودعوا لولادكم

أخلاق يمحوها فى افلامنا

والنمبر ون .. اللي هزمكم

ترويج لسيوف ويا صياعته 

 وسؤالي راضيين بذممكم؟

للحال إللي احنا وصلنا لها

ياولاد الفرعون المصري

فين راحت قوة أسلافكم ؟؟

🌹بقلمي/ صفاء الخواجة 🌹

😂غرقوه😂بقلم الشاعر مهندس/ محمود الحريري

 "غَرَّقُوه"

-----------

وقالوا إيه.. بيعوموه

لكن الحقيقة.. غرقوه

دول فطسوه..

أصبح مايسوى نص نكلة

من فلوس ايام زمان

أصبح مُهان.. 

والعَشَرة منه يادوب.. 

تمن علبة لبان.. 

ياميت خسارة على الجنيه

ماتيجوا نترحم عليه

ونفتكر أيام ماكنا بنعتمد

دايماً عليه.. 

كنا في الشدة نلاقيه

والجيوب دافيانة بيه

دلوقت أصبح ملطشة 

وسط الفلوس... 

وبكل قسوة عليه تدوس

روحوا اسألوا عنه الدولار

واسألوا عنه الريال أو الدينار 

تلاقوه.. صبح محتار

ومعدش ليه أي احترام

جوه.. أو بره الديار 

وقالوا إيه بيعوموه

لكن الحقيقة غرقوه

----------------------------

بقلمي؛ 

م /محمود الحريري

😥وداعا رمضان😥 كلمات الشاعر الكبير د. سمير خليل

 ----------

------------+++ وداعا رمضان +++---------------

ليـه يـا شـهْر  الصـيام ... فايِِـتنى أعَـيَّط  مُهْجِتِى

وابتِدِى العَد ليك تانى ... لشوقة الـعُودَه والفرحَه 

عَزايا سايبْلِى تَقْـوتى ... تِونِّس قَـلبى وسَـجْدِتِى

تِنوَّرلى وحدِة سِكِّتى ... ف دُنـيا ضَلمِـةِ السَّرْحَه

لحين ما ليلة البارحَه ... تِرَجَّعـلِى تـانى ضَـالِّتِى

د. سمير خليل

🍁مسحراتي🍁بقلم الشاعر الكبير د. سمير خليل

 مسحراتى داير ع البيوت مداح

بصوتى على نقرة طبلتى

تسرح شعور النوم نقرتى

قوم يا نايم إصحى 

وحد ربنا رزاقك مسا وصباح

رمضان كريم

كرمه مغرق م الغنى لفقير

ع السفره والطبليه

لقمه منهم هنيه

تكفى بالرضا ميه

وتعمل بيها المشاوير

رمضان كريم

وحد ربك بسحورك 

يا صايم لفطورك

فرحتك وسرورك

والجبره من عيدك

رمضان كريم رمضان كريم رمضان كريم

د. سمير خليل

🤲نفحة الريان🤲كلمات الشاعر الكبير د. سمير خليل

 -------------+++ نفحة الريان +++----------------

لا أوْحَشَ اللهُ  مِنك ... يا شهْر الصُّـوم بروكِيَّه

وانت قريب يومِى ... إتْــنِين وخَـمِيس نُوَّابَك

وسِتَّه بيض  منك  ... واخْواتها الليالي بَـدرِيَّه

صوم السَّنه أبْواب ... واشتِهى دَخْلَه من بابَك

نَفحِة عَتَبْ ريَّانك  ... بجَنة  الرِّضوان  إلاهِيَّه

د. سمير خليل

🌾مسحراتي بورسعيد🌾كلمات الشاعر مهندس/ محمود الحريري

 #مسحراتي بورسعيد

------------------------

مسحراتي.. وبورسعيدي

وكل ليلة.. أمشى وادور

من التجاري.. على الحميدي

ورايح اسحر.. حي الزهور

أحياء بلدنا حلوة وجميلة

ويزيد جمالها وقت السحور

ع الطبلة اغني.. واحكى حكايتِك

بلدي ياصامدة.. طول العصور

تاريخ نضالك الكل عارفة. 

لما احكي عنك باكون فخور

ع البحر راسية.. وسفينة ماشية

ياسلام عليكي..فاردة الشعور

وع المسلة.. نقعد شوية

والقعدة تبقى.. فرحة وسرور

ياعم حمزة هات التلامذة

ويلا بينا.. نقف طابور

لاجلك يابلدى ترخص حياتنا

وعشان عيونك ننحت صخور

أنا بورسعيدى.. والخير في إيدي

وعدوي دايماً. جوه الجحور

يَدَّك في يَدِّي.. واخدك واعَدِّي

ونروح نخطي فوق البحور

نحكي لولادنا.. أمجاد بلدنا

من أعلى مدنه.. وبصوت جهور

مهما حكينا.. أجمل مدينة

هى بلدنا.. بدر البدور

من جوه قلبي.. بادعي ياربي

تحفظ بلدنا.. بلد النسور

رمضان كريم.. ربك حليم

إحمد يزيدك... خليك شكور

أيامه بركة وخير ورحمة

رمضان مبارك بين الشهور

رمضااااااان كرررررريم

---------------------------------

بقلمي،، م/ محمود الحريرى

🌹رباعيات قبل المغرب 🌹بقلم الشاعر مهندس/ محمود الحريري

 رباعيات "قبل المغرب" 

-----------------------------

قبل المغرب خليك فاكر

طول رمضان رحمة وغفران

سامح واغفر ربك قادر

يملا حياتك نور وإيمان

🌟🌟🌟🌟🌟🌟

قبل المغرب إسأل ربك

إنه بنوره ينور قلبك

يملاه رحمة ويشرح صدرك

ربنا قادر يفرج كربك

------------------------

بقلمي؛

م/ محمود الحريري

🌹المسحراتي 🌹بقلم الشاعر مهندس/ محمود الحريري

 المسحراتي

----------------

مسحراتي على رجلي ماشي

وكل ليلة.. أنده واقول.

🌟🌟🌟🌟

إصحى وصحصح.. أذكر وسبح... 

صلى وسلم.. على الرسول

🌟🌟🌟🌟

إصحى يانايم.. وحد الدايم

تلقى النعيم.. وتنول قبول

🌟🌟🌟🌟

ردد معايا.. وقول ورايا

رمضان كريم.. وياريت يطول

رمضااااان كرييييييم

----------------------------------

بقلمي،، م/ محمود الحريرى

🌹قبل المغرب في رمضان🌹بقلم الشاعرة/ صفاء الخواجة

 (موسم جديد من قبل المغرب في رمضان)

قبل المغرب راضي الكل

تلقى حياتك زي الفل

يرضى عليك الله ويكون

عمرك كله مايعرف ذل

🍁🍁

قبل المغرب حب لغيرك

كل الفرح.ثواب هيجيلك

املا القلب بخير ومودة 

تلقى الضي مالي لك ليلك

🍁🍁

قبل المغرب كون إنسان

زي ما قال المولى كمان

اعطف على مسكين غلبان

تلقى ثوابه كريم منان

🍁🍁

🍁بقلمي/ صفاء الخواجة 🍁

🍁سطر فى السماء🍁كلمات الشاعر الكبير د. سمير خليل

 الصلاة والسلام عليك ... يا أحـمــد  الأسماء

عدد معلومات الله ... فى الصحو والإغــفاء

عدد الحركات والسكون ... أكانت أو تكــون

وما سيكون ...وكل حرف سطر فى السماء

د سمير خليل

😪منذ الرحيل😪 كلمات الشاعر مهندس/ محمود الحريري

 "مُنْذُ الرَّحِيلِ" 

-----------------

إِنِّي وَجَدْتُ الْعَيْشَ بَعْدَكَ مُؤْلِمَا

وَهَوَاكَ يَسْكُنُ فِي الضُّلُوعِ وَفِي الدَّمِ

مُنْذُ الرَّحِيلِ تَحَطَّمَتْ كُلُّ الْمُنَىٰ

وَالْحُلْوُ أَصْبَحَ طَعْمُهُ كَالْعَلْقَمِ

تَبْكِي الْعُيُونُ صَبَابَةً وَبِلَوْعَةٍ

وَمَرَارَةٌ بِالْحَلْقِ تَقْبَعُ فِي الفَمِ

بِالْأَمْسِ كَانَ النُّورُ يَغْمُرُ حُبَّنَا

وَالْيَوْمَ صَارَ الْقَلْبُ كَالْمُتَفَحِّمِ

وَتَأَجَّجَتْ نَارُ الْفِرَاقِ بِأَضْلُعِي

وَتَحَوَّلَ الْقَلْبُ السَّعِيدُ لِمَأْتَمِ

الْكَوْنُ أَمْسَىٰ مُظْلِمَاً مُتَجَهِّمَا

وَالْقَلْبُ أَصْبَحَ كَالْهَشِيمِ مُحَطَّمِ

مُنْذُ الرَّحِيلِ غَدَاٰ الْفُؤَادُ مُعَذَّبَا

لَايَتَّقِي طَعْنَ الرِّمَاحِ وَأَسْهُمِ 

يَارَبَّنَا أَرْجُو رِضَاكَ وَرَحْمَةً

تَغْشَىٰ حَبِيبَاً كَانَ مِثْلَ الْبَلْسَمِ

وَاكْتُبْ لَنَا أَنْ تَلتَقِي أَرْوَاحُنَا

فِي ذَٰلِكَ الْيَوْمِ المَهِيبِ الْأَعْظَمِ

------------------------------------

بقلمي؛ م/ محمود الحريري 

على بحر الكامل

🌹مصباح التسابيح🌹كلمات الشاعر الكبير د. سمير خليل

 -------+++ مصبا ح التسابيح +++-------

فلما أضاءت ما حولها ... نور  المَـصابيح

أخذت  لب  الفؤاد ... لخالقـنا  التسابيح

وسجادة   الليل ... يفرشها ورق  الشجر

وسِبحَة حبَّات القطر ... سبَّح  بها الريح

د سمير خليل