🌑ليل دايم🌑 بقلم الشاعرة/ صفاء الخواجة

 🍁ليل دايم🍁

مبقتش أتحمل تجادلني

وتبيع أحلامي وتحرمني

خلتني ف ليل دايم صاحي

والعمر بيجري ويخذلني

🍁بقلمي / صفاء الخواجة 🍁

🥀ظلم الغريب🥀كلمات الشاعرة/ صفاء الخواجة

 🍁ظلم الغريب🍁

مبقاش بعيد عننا

ولا بينا فيه أميال

الموت قريب مننا

ويشهد الزلزال

خافوا ياناس  ربنا

ونصلح الأحوال 

وبلاش يزيد همنا

من عم أو من خال

ظلم الغريب يتنسي

إلا القريب لو مال

ميعدلوش 100أسف

ولا صدقة ولا أموال

🍁بقلمي/صفاء الخواجة 🍁

🍁فى السقعة🍁 رباعية بقلم الشاعرة/ صفاء الخواجة

 🦋فى السقعة🦋

عمار يامحشي الكرنب

يامشبع الغلبان

منك نلاقي.. الدفا

في شتانا للسقعان

🦋بقلمي/ صفاء الخواجة 🦋

🪶حلم . و. جراد🪶كلمات الشاعرة/ صفاء الخواجة

 🌹حلم.. و.. 

جراد🌹

قلبي تعبان م. السكات

ظلم جاير ع. العباد

والدموع ف عيون بتصرخ

من نفوس فاضت فساد..

***

حتى حرفي كمان وقلمي

باتوا م. الحب فى بُعاد

شافوا قلوب كتير بتحزن

نبضها صابه. الكساد

***

حلمنا.. مكسور وراحل

قبره مليان.. بالرماد

وإللي حاول لِيه يحقق

أرغموه يعلن .حداد

***

طب قولولي.إيه يفرح

خيرنا حاوطه كتير جراد

الوباء. و غلاء بيطحن

والجميع بقى فى المزاد

***

مين يعيد الضحكة لينا

مين يطبطب ع الولاد

يأس مالي قلوب عيالنا

والأمل.. باع المعاد

***

حتى فن بلادي.. كله

بلطجة. وفجوره زاد

فين رسالته وامتى يبني!

برج يملاه.. الوداد 

***

كل أخبارنا.. الحزينة

زارعة جوانا ..السهاد

أرضنا بقى خوف ماليها

فرحها ملهوش سماد!!

***

🌹بقلمي / صفاء الخواجة 🌹

🐓مين قدك🐓كلمات الشاعر مهندس/ محمود الحريري

 "مين قدِّك" 

--------------

مين قدِّك في الدنيا ياعايقة

إتمخطري واتمايلي يارايقة

سايقة دلالك.. خفي ياغالية

أنا نِفسي أدوق طعم المرقة

.......

مغرورة وتتعالي عليا

نفسي ياحلوة تحني شوية

باحلم تعطيني ولو بيضة

أو ألاقي جناحك في إديا

......... 

ياجميلة ومهرك بقى غالي

واخواتك طالعين في العالي

أنا كل ماشوفك باتمنى

فرصة تحقق كل أمالي

.......... 

نفسي أشوفك فوق السفرة

إن شالله تكون آخر مرة

هاعمل حفلة تليق بمقامك

وتكون أحلى وأجمل سهرة

---------------------------------

بقلمي؛ م/ محمود الحريري

🤲ربنا موجود🤲 رباعية بقلم الشاعر مهندس/ محمود الحريري

 "ربنا موجود"

-----------------

ربنا موجود هو حامينا

ومصيرنا كمان مش بإدينا

بكره هتفرج والبال هيروق

والضحكة تنور ليالينا

---------------------------

بقلمي؛ م/ محمود الحريري

🤲السابقون السابقون🤲 بقلم الشاعر الكبير د. سمير خليل

 -------------+++ السَّابقون السَّابقون +++---------------

أحبابَـنــا  فى ثَــرَى الأجْــداثِ ثَرِيَّـا

                         أبِى وأمِّـى أمَــان القَـلبِ  والرُّؤيا

وإخوتِى فى الدَّمِ والعَيْـشِ والسَّكنِ

                         من تَرَكونى وحِيدًا أرقُبُ اللُّـقْـيا

فاسْـتَمْرَأتْ وحْشَةَ الأشــواقِ صَبْرِى

                         مُذ شَيَّعوا لِى بُكـاءَ الصَّمْتِ دَوِيَّا

يـا ربَّ أدْخِــلهُمْ والــزَّوْجَ  والــوَلـدَ

                        فى جنَّةِ الخُلدِ والرِّضـوانِ سَـوِيَّا

أجْدادنـا  أهْــلَــنا  صِـهْــرًا  وأنْسـابا

                        قَدْ كُنتُـمُ السَّمْـعَ والأبْـصـارَ  لـديَّا

عَـمَّاتُ  والعَــمَّ والخَـالاتُ والخَــالُ

                       جَـمْـعًـا مَع الزَّوجِ والأبنـاءِ حَـرْفِيَّا

أنْـسَــابُ أرْحامِــنا أو كُـلُّ ما زالـتْ 

                       دمُـوعُـنا لـــم تَـجِـفُّ  فِـيـه بُكِــيَّا

كُــلٌ مع الأهْـلِ فى جَـنَّــةِ الـمَأوَى

                       مِن مِـنَّـةِ اللـهِ  للسَّـابِقِــينَ  عَلِــيَّا

أكَابِــرُ القَــوْمِ فـى الــدِّين والعِـلْمٍ 

                       وصاحبُ الجَنْبِ والخِـلَّانِ  كُـلِّـيَّـا

ذو الأفْضالُ مِن مَهْدِى إلى لحْدِى

                       مَن عَلَّمنا من عُلـومِ الدِّينِ والدُّنيا

فى رحمةِ اللهِ والرِّضْوانُ منزِلكُم

                       مَنْ فى ثَرَى قَبْرَ ( إدْفِينا ) إسْمِيَّا

أو ضَمَّـهُ القبْرُ فى ثَراكِ  يا مِصْرُ

                       أو فى ثَـرَى أيَّمـا الأمْصارِ مَسْجِيَّا

يا مَن نَشَأنا بحُـبِّ اللهِ إخْـوانا

                      والمَـوْتُ  فَــرَّقَـنا  عَليْـه  قَــصْرِيَّا

طابَ الثَّرى بِكَمُ عطرًا وتَحْنانا

                      ونِلـتُـمُ صِـدْقَ وَعْـدَ  اللـهِ مَـأتِــيَّا

جَـنَّاتُ عَدۡنࣲ والرَّيَّــانُ  مَدٔخَلُها 

                      لا حَــرَّ فِـيـها  ولا بَــرْدًا  نِــهائِــيَّا

ألَّا يَـجوعَ مَن فيـها ولا يَعْــرَى 

                      لا مَـوْتَ فيـها ولا شَــقاءَ لحْـظِيَّا 

لباسُكُــمْ مِن حَـرِيرٍ وإسْـتَبْرَق

                      بَيْنَ الحُـورِ  الـعِـينِ بَـدرًا  سـَنِـيَّا

لكُم أنْهَـارُ  من  عَسَـلٍ  مُـصَفَّى 

                      والخمْـرُ فى لـذَّةٓ الإنعــامِ سُقِيَّـا

أنتُـم وأزواجُكُـمُ على الأرائِـكِ

                      فى حــلْيَـةِ اللؤْلـؤٍ الوضَّـاءِ ثُرَيَّا

فى صُحْــبَةِ الأنبِـياءِ والرُّسُــلِ 

                     طـــهَ إمامُكُـمُ  لـلجَـنَّــةِ  العُـلـيَا

برِفْـقَــةِ الصَّالحِـينَ  والشُّهَـداءِ 

                      وحَسُنَ أولئِـكَ الأصْـحـابُ نَدِيَّا

لكُــم  مـا تَـدَّعُـونَ  مِـن نِعَــمٍ

                      وعْـدًا مِنِ الـلــهِ ووعـدُهُ مــأتِيَّا

الجَمْعُ فى نعمَةِ الجَـنَّاتِ مُنَعَّـمُ

                     فى أىِّ صُــورَةٍ  يَشَـاءُ المُـحَــيَّا

يُسْقِيكُمُ المَــاءَ صَفْوانَا مُـحَمَّـدُ

                     لا تَـظْـمَأُ بَـعْـدها الأفواهُ قَطْـعِيِّا

مِن مِسْكِ الجنَّتيْنِ العِطرُ يَنبَعِثُ

                     دائِـمُ الخُلــودِ فى الأنْـفِ شـَذِيَّا

اللهَـمَّ  ألحِـقْــنا بِـهِـم  وذُرِّيَّاتِـنا 

                     مَـتَى أتَـى أمْـرُكَ للمَـسَـاقِ هَـيَّا

والتَفَّتِ السَّاق فوقَ السَّاقِ طَيَّا 

                     ربَّــاهُ فى الــثُلَّـةِ  الأوَّلينَ ذَوِيَّا

د. سمير خليل

🔥الأزمة كبيرة🔥كلمات الشاعر مهندس/ محمود الحريري

 "الأزمة كبيرة" 

------------------

الأزمة كبيرة ومالها حدود

معقولة البركة ف يوم هتعود

مش طايلين قرصين طعمية

ولا حتى المش المليان دود

...... 

يرحم أيام البركة زمان

والخير حوالينا ف كل مكان

بيقولوا جنيهنا بيتعوم 

اتاريه ياحبيبي صبح غرقان 

....... 

الحد الأدنى مع العلاوات

والدنيا بقت كلها أزمات

حتى السكر ومعاه الزيت

أسعارهم وصلت للسماوات

........ 

تمن البيضة بقى خمسة جنيه

حد يعَرَّفني الأسباب إيه

واللي اسمها إيه عند الجزار

السعر رهيب مقدرش عليه

........ 

إرحمنا يارب الكون يامُعين

إمتى قلوب التجار هتلين

أسعار بتزيد من غير رحمة

خلت فيه ناس بيناموا جعانين

------------------------------------

بقلمي؛ م/ محمود الحريري

🥀قالها زمان🥀كلمات الشاعرة/ صفاء الخواجة

 ♥️قالها زمان♥️

قالها الشافعي زمان ياولاد

ليه بنعيب فى زماننا ياناس

كل عيوب الدنيا دي فينا

من أفعال وسواس خناس

♥️بقلمي/ صفاء الخواجة ♥️

🥀فضفضة🥀كلمات الشاعرة/ صفاء الخواجة

 🔥فضفضة🔥

نفسي أأقول ياقلم

من حرقتي وهمي

ليه ف الحياة الألم

ده حقيقة مش وهمي

🔥بقلمي/ صفاء الخواجة 🔥

🥀أوكار البوم🥀كلمات الشاعرة/ صفاء الخواجة

 🦉 أوكار البوم🦉

الحلم الميت جوايا

كان نفسه يعيش

اغتصبوا أماني وموالي

ورموني بقشيش

***

الحلم الميت كان يصرخ

فى حياته .. يقول

ادوني الفرصة ح أوريكم

والكيد لعزول

***

كان.. صابر حلمي 

ومتحلي بالصلا والصوم

متأكد بكره ح تتعدل

والفرحة تدوم!!

***

كان عايز يجري ويهدمها

أوكار البوم

قتلوه من قبل مايوصلها

اتسرسب دمه وخلوني

فى بحوره باعوم

***

🦉بقلمي/ صفاء الخواجة 🦉

🥀حلاوة الروح🥀بقلم الشاعر مهندس/ محمود الحريري

 "حلاوة الروح" 

-----------------

إسمعها كلمة مني.. وبمنتهى الوضوح

حلاوة الشكل والمنظر مصيرها تروح

تفضل حلاوة الطبع مهما الزمن عدى

أصل الحلاوة بجد هي حلاوة الروح

-------------------------------------------

بقلمي؛ م/ محمود الحريري

💐كان زمان💐سجال دويتو بقلم الشاعر م. محمود الحريري والشاعرة/ صفاء الخواجة

 🦋 كان زمان🦋

سجال دويتو بين

الشاعرة أ. صفاء الخواجة

والشاعر م. محمود الحريري 

🌻🌻🌻🌻🌻🌻🌻🌻

أ. صفاء 

لما كان بالدنيا.. خير

قلبي عمره ماقال ياريت

كان أمان مالي حياتنا

بركة .حب .فى كل بيت

بين جيراننا وبين صحابنا

والهنا له ألف صيت

م/محمود 

كانت الدنيا جميلة

والقلوب كان فيها رحمة

والبيوت الخير ماليها

والأمان في حياتنا نعمة

والجيران عزوة وعيلة

والمعاملة ذوق وحكمة

أ. صفاء 

كله يجري يواسي كله

والأذى يبعد.. بميل

كله عاشق .. للمحبة

والمساعدة زي سيل

عشرة حلوة. صافية دايما

وفى چيناتنا كل جيل

م/محمود 

في الفرح  كان كله يفرح

وبكل حب يروح يبارك

لو حد فينا احتاج مساعدة

الكل يجري عشان يشارك

كنا دايما قلب واحد

لو يوم وقعنا في المهالك

أ. صفاء 

النهاردة الكره... سايد

والقلوب بيها حقد دايب

والأناني له .. مخالب

نهشها باين وصايب

بلطجة وكتير جرايم

والحياة بقى لونها عايب

م/محمود 

النهاردة ياميت خسارة

الحقد زاد جوه القلوب

والبلطجة هي الشطارة

والنفاق مفيهوش عيوب

كل الأمور إتغيرت

وكل شئ أصبح مقلوب

أ. صفاء 

ليه نسلم . ليه نطاوع

ليه نعيشها بالمصايب

يلا نرجع وفى حياتنا

كل خيرها مايبقى غايب

م/محمود 

عشان مانتهنا بحياتنا 

لازم نغير نفسنا

ونرجع الرحمة لقلوبنا

والخير يغطي أرضنا

لو قلوبنا تبقى صافية

يرضى علينا ربنا

***

🦋بقلم أ. / صفاء الخواجة 🦋

            م/ محمود الحريري

🪗كان زمان🪗بقلم الشاعر مهندس/ محمود الحريري

 " 

"كان زمان" 

---------------

زمان.. كانت الدنيا جميلة

والقلوب كان فيها رحمة

والبيوت الخير ماليها

والأمان في حياتنا نعمة

والجيران عزوة وعيلة

والمعاملة ذوق وحكمة

في الفرح  كان كله يفرح

وبكل حب يروح يبارك

لو حد فينا احتاج مساعدة

الكل يجري عشان يشارك

كنا نبقى قلب واحد

لو يوم وقعنا في المهالك

النهاردة ياميت خسارة

الحقد زاد جوه القلوب

والبلطجة هي الشطارة

والنفاق مفيهوش عيوب

كل الأمور إتغيرت

وكل شئ أصبح مقلوب

عشان مانتهنا بحياتنا 

لازم نغير نفسنا

ونرجع الرحمة لقلوبنا

والخير يغطي أرضنا

لو قلوبنا تبقى صافية

ربنا يبارك لنا.. 

-----------------------------

بقلمي؛

م/ محمود الحريري

من وحي كلمات نصالشاعرة القديرة

 أ. صفاء الخواجة"ألف صيت"